आज ३० मार्च
रेडिओ सिलोन म्हणजेच श्रीलंका ब्रॉडकास्टिंग कापोर्रेशन (SLBC) म्हटलं हमेशा जवाँ गीत, एक और अनेक, पुरानी फिल्मोंके गीत, ग्रामोफोन संगीत धारा, बदलते हुए साथी, अनोखे बोल असे चाळीस-पन्नासच्या दशकाचा सुगंध असलेली अनेक जुनी गाणी ऐकवणारे, श्रोत्यांशी आपलेपणाने संवाद साधणारे कार्यक्रम.
३० मार्च १९५१ रोजी सायंकाळी ५ वाजता रेडिओ सिलोनची हिंदी सेवेची सुरुवात झाली. रेडिओ सिलोन मध्ये आजही जुन्याकाळातील दर्दी श्रोते आठवणीत हरवून जातात. विविध वयोगटातील, जातीधर्मांतील, भिन्न विचारसरणीच्या देश परदेशातील करोडो श्रोत्यांना एका सुरेल माळेत गुंफण्याचे कार्य सिलोनने केले. १९४९ ते १९७४ या सुवर्णकाळातील अजरामर गाणी रेडीओ सिलोनने रसिकांना केवळ ऐकवलीच नाहीत तर श्रोत्यांमध्ये एक आगळा ऋणानुबंध निर्माण केला. रेडिओ सिलोनच्या केंद्रात हिंदी चित्रपट संगीतातील अनेक गाणी जपून ठेवलेली आहेत.
१९४९ ते ६०च्या कालखंडात ऑल इंडिया रेडिओवर हिंदी सिनेमागीतांना बंदी असताना रेडिओ सिलोनने ती सारी गाणी घराघरात पोहोचवली. आशिया खंडातल्या विविध भाषांमधल्या ३५ हजार ओरिजनल रेकॉर्डस सिलोनच्या संग्रही असून, विविध भारतीकडे नसलेल्या अनेक रेकॉर्ड्सचा त्यात समावेश आहे. गोपाल शर्मा पासून पद्मिनी परेरा आणि ज्योती परमार या उद्घोषकांचे चाहते आजही त्यांच्याशी नाते टिकवून आहेत. कुमार नवाथे आणि त्यांच्यासारख्या अन्य चाहत्यांनी भारतभर रेडिओ सिलोन श्रोता संघ स्थापन केले आहेत. आर्थिक घडी विस्कटल्यानंतर एप्रिल, २००८ मध्ये रेडिओ सिलोनचे सायंकालीन प्रक्षेपण बंद झाले आणि करोडो संगीतप्रेमी हळहळले. पण २०१२ मध्ये रेडिओ सिलोनची भारतातील लोकप्रियता समजल्यानंतर ही हिंदी सेवा पुन्हा सुरू झाली.
आजचा म्हणजेच ३० मार्चचा रेडिओ सिलोनचा उद्घोषक ज्योती परमार यांनी सादर केलेला कार्यक्रम.
https://www.youtube.com/watch?v=rXfJiiLbiQw
To listen live via Internet please visit web site –
www.slbc.lk
and click on the Link -Asia Hindi Listen live,
Or
http://tunein.com/radio/SLBC-Asia-Hindi-Service-s237007/
संजीव वेलणकर पुणे.