बॉलिवूड अभिनेता आर माधवनचा आज वाढदिवस आहे. त्यांचा जन्म 1 जून 1970 रोजी जमशेदपूर, झारखंड येथे झाला. त्यांचे पूर्ण नाव रंगनाथन माधवन आहे. मुंबईच्या केसी कॉलेजमधून पोस्ट ग्रॅज्युएशन केलेल्या आर माधवनला सुरुवातीपासूनच अभिनेता व्हायचं नव्हतं. माधवनचे वडील टाटा स्टीलमध्ये मॅनेजमेंट एक्झिक्युटिव्ह होते आणि आई सरोज बँक ऑफ इंडियामध्ये मॅनेजर होत्या. लहानपणापासून अभ्यासात हुशार असलेल्या आर माधवनला मोठे होऊन आर्मी ऑफिसर बनायचे होते.
त्यासाठी त्यांनी नौदल, लष्कर आणि हवाई दलाचे प्रशिक्षणही घेतले. त्यांना महाराष्ट्राचा सर्वोत्कृष्ट कॅडेट पुरस्कारही मिळाला. यानंतर त्यांना शॉर्ट टर्म ट्रेनिंगसाठी इंग्लंडला जाण्याची संधी मिळाली. पण कदाचित नशिबाच्या मनात काही वेगळंच असेल, म्हणून जेव्हा सैन्यात भरती होण्याची वेळ आली तेव्हा त्यांचे वय 6 महिन्यांहून कमी निघाले. त्याच वेळी, शिक्षण पूर्ण केल्यानंतर, आर माधवनने कम्युनिकेशन आणि पब्लिक स्पीकिंगचे वर्ग घेण्यास सुरुवात केली.
आयुष्याचा जोडीदार
महाराष्ट्रातील कोल्हापूर येथे त्याची भेट सरिताशी झाली. सरिताला एअरहोस्टेसची नोकरी मिळाल्यावर ती एके दिवशी माधवनचे आभार मानायला आली. सरिताने त्याला डिनरसाठी बोलावले, त्यानंतर दोघांची मैत्री झाली आणि लवकरच या मैत्रीचे रुपांतर प्रेमात झाले. सुमारे आठ वर्षे एकमेकांना डेट केल्यानंतर माधवन आणि सरिताने तामिळ रितीरिवाजांनुसार लग्न केले. दोघांना वेदांत नावाचा मुलगा आहे.
मॉडेलिंगने करिअरला सुरुवात
दरम्यान, माधवनने मुंबईत अर्धवेळ नोकरी म्हणून मॉडेलिंगला सुरुवात केली. 1996 मध्ये, माधवनने त्याचा एक पोर्टफोलिओ एका मॉडेलिंग एजन्सीला पाठवला जिथून त्याला जाहिरातीच्या ऑफर मिळू लागल्या. 1996 मध्ये, माधवनने सुधीर मिश्रा यांच्या ‘इस रात की सुबह नहीं’ या चित्रपटाद्वारे चित्रपटसृष्टीत पदार्पण केले. या चित्रपटात तो अगदी छोट्या भूमिकेत होता. पण त्याच्या निरागसपणाने आणि सुंदर हास्याने सर्वांचे लक्ष वेधून घेतले आणि त्यानंतर माधवनला हिंदी, इंग्रजी, तमिळ, तेलगू इत्यादी चित्रपटांमध्ये काम करण्याची संधी मिळाली.
‘रेहना है तेरे दिल में’ मिळाली खरी ओळख
पण माधवनला खरी ओळख 2001 मध्ये आलेल्या ‘रेहना है तेरे दिल में’ चित्रपटातून मिळाली. यानंतर माधवन रंग दे बसंती, गुरू, मुंबई मेरी जान, 3 इडियट्स, तनु वेड्स मनू इत्यादींसह अनेक बॉलिवूड चित्रपटांमध्ये चमकदार कामगिरी करताना दिसला. आर माधवन अजूनही चित्रपटसृष्टीत सक्रिय असून लवकरच रॉकेट्री या चित्रपटात दिसणार आहे. या चित्रपटाचा नुकताच कान्स फिल्म फेस्टिव्हल 2022 मध्ये प्रीमियर झाला आणि त्याचे खूप कौतुक झाले. हा चित्रपट 1 जुलै रोजी चित्रपटगृहात प्रदर्शित होणार आहे. हा चित्रपट रॉकेट्री रॉकेट वैज्ञानिक नंबी नारायणन यांच्या जीवनावर आधारित आहे. अभिनयासोबतच आर माधवनने या चित्रपटाचे लेखन आणि दिग्दर्शनही केले आहे.